ရွှေ့ပြောင်းနေထိုင်သူများဆိုင်ရာ မူဝါဒအသစ်ကို ပညာရှင်များ ဝေဖန်

ဖင်လန်အစိုးရဟာ နိုင်ငံခြားကနေ အသစ်ရောက်လာမယ့် ရွှေ့ပြောင်းနေထိုင်သူတွေ (Immigrants) အတွက် အလုပ်လက်မဲ့ ထောက်ပံ့ကြေးစနစ်ကို ပြောင်းလဲဖို့ ပြင်ဆင်နေပါပြီ။ ဒီအစီအစဉ်အသစ်ကို ၂၀၂၇ ခုနှစ် နှစ်စပိုင်းကစပြီး သက်ရောက်မှုရှိလာမှာဖြစ်လို့ သက်ဆိုင်ရာကဏ္ဍက ပညာရှင်တွေကတော့ အတော်လေး စိုးရိမ်ပူပန်နေကြပါတယ်။

အစိုးရရဲ့ အစီအစဉ်သစ်မှာ ဘာတွေပါဝင်လဲ၊ ဘာကြောင့် ဝေဖန်ခံနေရတာလဲဆိုတာကို အောက်ပါအတိုင်း အနှစ်ချုပ် တင်ပြပေးချင်ပါတယ်။

၁။ အသစ်ရောက်လာသူတွေအတွက် ခံစားခွင့် လျော့နည်းသွားမယ့် အခြေအနေ၊

လက်ရှိစနစ်မှာတော့ နိုင်ငံခြားကပြောင်းလာသူတွေဟာ အလုပ်မရသေးခင်ကာလမှာ ဖင်လန်နိုင်ငံသားတွေနဲ့တန်းတူ အလုပ်လက်မဲ့ခံစားခွင့် ရနေတာပါ။ ဒါပေမဲ့ အဆိုပြုထားတဲ့ ဥပဒေကြမ်းအရဆိုရင်တော့ အလုပ်မရသေးတဲ့သူတွေဟာ ပုံမှန်ခံစားခွင့်အစား "Integration Support" လို့ခေါ်တဲ့ ပေါင်းစည်းရေးဆိုင်ရာ ထောက်ပံ့ကြေးကိုသာ ရရှိတော့မှာ ဖြစ်ပါတယ်။

Yle News ရဲ့ အဆိုအရ ဒီပမာဏဟာ တစ်ရက်ကို (၃၃.၆၄) ယူရို လောက်ပဲ ရှိမှာဖြစ်ပြီး၊ ပုံမှန် အလုပ်ရှာဖွေသူတွေရတဲ့ ပမာဏရဲ့ ၉၀ ရာခိုင်နှုန်းလောက်ပဲ ရှိပါတော့တယ်။

လူမှုဖူလုံရေးဝန်ကြီး Sanni Grahn-Laasonen ကတော့ ဒီလိုလုပ်တာဟာ နိုင်ငံခြားသားတွေအနေနဲ့ ဘာသာစကား (ဖင်လန် သို့မဟုတ် ဆွီဒင်) ကို မြန်မြန်တတ်အောင်နဲ့ အလုပ်မြန်မြန်ရအောင် တွန်းအားပေးချင်လို့ပါလို့အကြောင်းပြထားပါတယ်။

၂။ "မုန်လာဥနဲ့ တုတ်" ဗျူဟာ (Carrot-and-Stick Approach)

ဒီအစီအစဉ်ကို "မုန်လာဥနဲ့ တုတ်" လို့ တင်စားခေါ်ဝေါ်ကြပါတယ်။ ကောင်းရင်ဆုပေးမယ်၊ မကောင်းရင် ဒဏ်ပေးမယ်ဆိုတဲ့ သဘောမျိုးပါ။

ဖင်လန်ကိုရောက်ပြီး ပထမ (၃) နှစ်တာ ကာလအတွင်းမှာ အလုပ်မရမချင်း (သို့မဟုတ်) ဘာသာစကား ကျွမ်းကျင်ကြောင်း သက်သေမပြနိုင်မချင်း ဒီလျှော့ချထားတဲ့ နှုန်းထားအတိုင်းပဲ ရနေမှာပါ။

တကယ်လို့ ပုံမှန်ခံစားခွင့်အဆင့်ကို လိုချင်ရင်တော့ ဘာသာစကားကို B1.1 Level အထိ တတ်မြောက်ထားကြောင်း သက်သေပြရပါမယ်။

Tampere မြို့က တာဝန်ရှိသူ Mari Taverne ကတော့ ဒီ B1.1 သတ်မှတ်ချက်ဟာ "လက်တွေ့မကျဘဲ အရမ်းမြင့်လွန်းတယ်" လို့ ထောက်ပြပါတယ်။ အထူးကြပ်မတ်သင်တန်းတွေ တက်ရင်တောင် A2 Level လောက်ပဲ ရနိုင်တာမို့ ဒါဟာ မဖြစ်နိုင်တဲ့ ရည်မှန်းချက်တစ်ခုလို ဖြစ်နေပါတယ်။

၃။ တန်းတူညီမျှမှုရှိရဲ့လား။

ဒီအစီအစဉ်အပေါ် ဖင်လန်မြို့ကြီးတွေ (Helsinki, Vantaa, Tampere) က ကျွမ်းကျင်သူတွေရဲ့ သဘောထားကတော့ မကောင်းလှပါဘူး။

Vantaa မြို့က တာဝန်ရှိသူ Suvi Lindén က ဒီအဆိုပြုချက်ဟာ 

"တန်းတူညီမျှမှုဆိုင်ရာ မေးခွန်းထုတ်စရာတွေ" 

ဖြစ်လာစေတယ်လို့ ဆိုပါတယ်။ 

အသစ်ရောက်လာသူတွေကို ဒေသခံတွေနဲ့ မတူညီတဲ့ အနေအထားတစ်ခုမှာ ခွဲခြားဆက်ဆံသလို ဖြစ်နေပြီး၊ ဒီလိုလုပ်လို့လည်း အခြေအနေတွေ ပိုကောင်းလာစရာ အကြောင်းမမြင်ဘူး

လို့ ဝေဖန်ပါတယ်။

Helsinki မြို့က Glenn Gassen ကလည်း ဒီအစီအစဉ်ကြောင့် လူမှုရေးပြဿနာတွေနဲ့ ခွဲခြားဆက်ဆံမှုတွေ ပိုများလာနိုင်တယ်လို့ သတိပေးပါတယ်။ အထူးသဖြင့် ကုန်ဈေးနှုန်းကြီးမြင့်တဲ့ မြို့တော်မှာ နေထိုင်သူတွေအတွက် ဝင်ငွေလျော့နည်းသွားတာဟာ ကြီးမားတဲ့ ရိုက်ခတ်မှုဖြစ်စေနိုင်ပါတယ်။

၄။ ဘတ်ဂျက်ဖြတ်တောက်မှုနဲ့ ဝန်ထုပ်ဝန်ပိုးများ၊

တဖက်မှာ အစိုးရက မြို့နယ်အလိုက် ဝန်ဆောင်မှုပေးရမယ့် တာဝန်တွေကို တိုးမြှင့်လိုက်ပါတယ်။ ဥပမာ - အလုပ်လက်မဲ့စာရင်းသွင်းပြီး ၆ လအတွင်း ဘာသာစကားသင်တန်းတွေ ပေးရမယ်ဆိုတာမျိုးပေါ့။

ဒါပေမဲ့ ပြဿနာက ဘတ်ဂျက်တွေကိုတော့ ဖြတ်ထားခံရတာပါ။ ဟယ်လ်စင်ကီမြို့ဆိုရင် လူဝင်မှုကြီးကြပ်ရေး ဝန်ဆောင်မှု ဘတ်ဂျက် ၅၀% လောက် ဖြတ်တောက်ခံထားရတယ်လို့ သိရပါတယ်။

"ပိုက်ဆံလျှော့ပေးပြီး ဝန်ဆောင်မှုကိုတော့ ပိုကောင်းအောင်လုပ်ခိုင်းလို့ မရနိုင်ပါဘူး"

 လို့ ပညာရှင်တွေက တဲ့တိုးပဲ ပြောဆိုကြပါတယ်။ ဂျာမနီနိုင်ငံလိုမျိုး ပေါင်းစည်းရေးလုပ်ငန်းစဉ်တွေမှာ ဘတ်ဂျက်အလုံအလောက်သုံးခဲ့လို့ အောင်မြင်ခဲ့တဲ့ သာဓကတွေကိုလည်း ထောက်ပြကြပါတယ်။

၅။ ဖွဲ့စည်းပုံအခြေခံဥပဒေနဲ့ ကိုက်ညီမှုရှိရဲ့လား။

ဒီဥပဒေကြမ်းဟာ ဖင်လန်ဖွဲ့စည်းပုံအခြေခံဥပဒေနဲ့ ညီရဲ့လားဆိုတာလည်း အငြင်းပွားစရာ ဖြစ်နေပါတယ်။ လူမျိုး၊ ဘာသာစကားအပေါ်မူတည်ပြီး ခွဲခြားဆက်ဆံတာကို ဥပဒေက တားမြစ်ထားလို့ပါ။ ဝန်ကြီးဌာနဘက်ကတော့ လက်ရှိ မူကြမ်းက ဥပဒေနဲ့ညီပါတယ်လို့ ဆိုပေမယ့် ပါလီမန်ကော်မတီကတော့ ဆက်လက်စစ်ဆေးသွားဦးမှာပါ။

နိဂုံးချုပ် သုံးသပ်ချက်

ပညာရှင်တွေကတော့ ဒီအစီအစဉ်ဟာ ဖင်လန်ကိုလာမယ့် နိုင်ငံခြားသားတွေအတွက် "မှားယွင်းတဲ့ သတင်းစကား" ကို ပေးသလို ဖြစ်နေတယ်လို့ သတိပေးပါတယ်။ ဖင်လန်ဟာ လူဦးရေကျဆင်းနေပြီး လုပ်သားအင်အား လိုအပ်နေတဲ့အချိန်မှာ လာမယ့်သူတွေကို နွေးထွေးစွာ ကြိုဆိုရမယ့်အစား "နိုင်ငံခြားသားအကွက် (Immigrant Box)" 

ထဲထည့်ပြီး ခွဲခြားဆက်ဆံနေမယ်ဆိုရင် လူ့အဖွဲ့အစည်းနဲ့ သဟဇာတဖြစ်ဖို့ ခက်ခဲပါလိမ့်မယ်။

ဒီဥပဒေမူကြမ်းဟာ လက်ရှိမှာတော့ ဆွေးနွေးဆဲအဆင့်မှာပဲ ရှိပါသေးတယ်။ ၂၀၂၇ ခုနှစ် ဇန်နဝါရီ ၁ ရက်နေ့ နောက်ပိုင်းမှ ရောက်လာမယ့်သူတွေအတွက်သာ သက်ရောက်မှာဖြစ်ကြောင်း သိရှိရပါတယ်။