တရားမဝင်နေထိုင်သူများအတွက်ကြီးမားသော ပိတ်ပင်မှုနှင့် ဖမ်းဆီးမှုများ စတင်

Kansallinen Kokoomus (NCP) ဦးဆောင်သော ဖင်လန်အစိုးရသည် တရားမဝင်ရွှေ့ပြောင်းနေထိုင်သူများကို ကိုင်တွယ်ရန်၊ နိုင်ငံခြားသားများဆိုင်ရာဥပဒေကို ပြင်ဆင်သည့် အဆိုပြုချက်များကို အင်အားပြည့် အတည်ပြုလိုက်ပြီဖြစ်သည်။ ဤပြင်ဆင်ချက်များတွင် ဝင်ရောက်ခွင့်ပိတ်ပင်မှုကာလ ပိုမိုရှည်လျားလာခြင်း၊ ဖမ်းဆီးထိန်းသိမ်းမှုကာလ တိုးမြှင့်ခြင်း နှင့် တရားဝင်နေထိုင်ခွင့်အခြေအနေများကို ပိုမိုတင်းကျပ်စွာ သတ်မှတ်ခြင်း တို့ပါဝင်သည်။  

အဓိကပြောင်းလည်းမှုများ  

1. ဝင်ရောက်ခွင့်ပိတ်ပင်မှုကာလ ၅ နှစ်မှ ၁၅ နှစ်အထိ တိုးမြှင့်  

• ယခင်က တတိယနိုင်ငံသားများအား အများဆုံး ၅ နှစ် ဝင်ရောက်ခွင့်ပိတ်ပင်နိုင်ခဲ့သော်လည်း၊ ယခုအခါ ၁၅ နှစ်အထိ တိုးမြှင့်နိုင်ပြီဖြစ်သည်။  
• ဥရောပသမဂ္ဂ (EU) နှင့် Schengen ဧရိယာအားလုံးသို့ ဝင်ရောက်ခွင့်ကို ပိတ်ပင်နိုင်မည်။  

2. ဖမ်းဆီးထိန်းသိမ်းမှုကာလ ၁၂ လမှ ၁၈ လအထိ တိုးမြှင့်  

• နိုင်ငံမှ နှင်ထုတ်ရန် အမိန့်ချမှတ်ထားသူများအား ယခင်က ၁၂ လအထိသာ ထိန်းသိမ်းထားနိုင်ခဲ့သော်လည်း၊ ယခုအခါ ၁၈ လအထိ တိုးမြှင့်ထားသည်။  
• အများပြည်သူလုံခြုံရေး သို့မဟုတ် အမျိုးသားလုံခြုံရေးအတွက် အန္တရာယ်ရှိသူများကို နှင်ထုတ်ရန် ဆုံးဖြတ်ချက်မချမီတွင် ပင် ၆ လမှ ၁၂ လအထိ ကြိုတင်ထိန်းသိမ်းနိုင်မည်။  

3. ပူးပေါင်းဆောင်ရွက်ရန် တာဝန်ခံမှု  

• ဖင်လန်တွင် နေထိုင်ခွင့်ပြုခံထားရသူများအနေဖြင့် နိုင်ငံမှ နှင်ထုတ်ခံရပါက အာဏာပိုင်များနှင့် ပူးပေါင်းဆောင်ရွက်ရန် တာဝန်ရှိသည်။  
• ဤတာဝန်ကို မလိုက်နာပါက ဝင်ရောက်ခွင့်ပိတ်ပင်မှု ချမှတ်နိုင်သည်။  

4. နေထိုင်ခွင့်ပြုချက်ပြန်ရုပ်သိမ်းခြင်းနှင့် စစ်ဆေးခြင်း  

ဖင်လန်တွင် အချိန်အတော်ကြာ မနေထိုင်သူများ၊ အများပြည်သူလုံခြုံရေးကို ခြိမ်းခြောက်သူများ သို့မဟုတ် မှားယွင်းသော အချက်အလက်များပေးသူများ၏ နေထိုင်ခွင့်ပြုချက်ကို ပြန်လည်ရုပ်သိမ်းနိုင်သည်။  

ဒုက္ခသည်စခန်းတွင် နေထိုင်နေသော ၁၈ နှစ်အထက် လျှောက်ထားသူများအား နေထိုင်ရန် ကန့်သတ်ချက်များ သတ်မှတ်နိုင်သည်။  

အခြားသောအရေးကြီးသည့် အချက်များ  

ဖမ်းဆီးထိန်းသိမ်းမှုဆိုင်ရာ ဆုံးဖြတ်ချက်များကို ရဲတပ်ဖွဲ့ သို့မဟုတ် နယ်စပ်အာဏာပိုင်များက ချမှတ်မည်။  

Finnish Immigration Service (Migri) သည် ထိန်းသိမ်းရေးစခန်းများ၏ လုပ်ငန်းဆောင်တာများကို ကြီးကြပ်မည်။  

ဘာကြောင့် ဤသို့ပြုပြင်ပြောင်းလဲမှုများ ပြုလုပ်ရသနည်း  

ဤဥပဒေပြင်ဆင်ချက်များသည် ဖင်လန်နိုင်ငံ၏ လူဝင်မှုကြီးကြပ်ရေးမူဝါဒကို တင်းကျပ်စေရန် ရည်ရွယ်သည်။ အထူးသဖြင့် –  

• တရားမဝင်နေထိုင်သူများ၏ အရေအတွက် မြင့်တက်လာမှု၊  
•  အများပြည်သူလုံခြုံရေးနှင့် အမျိုးသားလုံခြုံရေးအတွက် ခြိမ်းခြောက်မှုများ၊  

ဥရောပသမဂ္ဂ၏ လူဝင်မှုကြီးကြပ်ရေးဆိုင်ရာ စံနှုန်းများနှင့်အညီ စည်းမျဉ်းများ ချမှတ်ရန် လိုအပ်ချက်တို့ကြောင့် ဖြစ်သည်။  

(သတင်းအရင်းမြစ်: Finnish Immigration Service, Migri)