.jpeg)
နွေရာသီရောက်ပြီဆိုတာနဲ့ ကမ္ဘာတစ်ဝန်းမှာ နေ့တာရှည်ပြီး ညတာတိုတာမျိုး ကြုံတွေ့ရလေ့ရှိပေမယ့် ညဘက်မှာပါ နေလုံးဝမဝင်ဘဲ နေ့ခင်းဘက်လို လင်းထိန်နေမယ့် အံ့မခန်း သဘာဝဖြစ်စဉ်ကြီးတစ်ခုကတော့ ဖင်လန်နိုင်ငံမှာ တရားဝင်စတင်လို့ လာပါပြီ။
ဖင်လန်နိုင်ငံရဲ့ မြောက်ဖျားပိုင်းဒေသတွေမှာ “ညမရှိတဲ့ည” သို့မဟုတ် ‘Nightless Nights’ (Midnight Sun) လို့ လူသိများတဲ့ ရာသီဥတုဟာ ပြီးခဲ့တဲ့ မေလ ၁၆ ရက် စနေနေ့ကတည်းက စတင်အသက်ဝင်ခဲ့ပြီ ဖြစ်ပါတယ်။
ဖင်လန်နိုင်ငံရဲ့ အမြောက်ဘက်အကျဆုံးမြို့ဖြစ်တဲ့ Utsjoki အပါအဝင် Lapland မြောက်ပိုင်းက မြို့ပြတွေမှာ နေထိုင်ကြသူတွေဟာ လာမယ့် နှစ်လကျော် (ရက်ပေါင်း ၇၀ ကျော်) တိုင်တိုင် နေမင်းကြီး မိုးကုပ်စက်ဝိုင်းအောက် ငုပ်လျှိုးကွယ်ပျောက်မသွားဘဲ ၂၄ နာရီပတ်လုံး လင်းထိန်နေမယ့် ထူးခြားဆန်းပြားတဲ့ သဘာဝအလှတရားကို အပြည့်အဝ ခံစားကြရတော့မှာပါ။
အာတိတ်စက်ဝိုင်းနှင့် ညမရှိတဲ့ညများ
ဒီလို ညဘက်မှာပါ နေမဝင်ဘဲ လင်းထိန်နေတဲ့ ဖြစ်စဉ်ဟာ ပထဝီဝင်အနေအထားအရ အာတိတ်စက်ဝိုင်း (Arctic Circle) အထက်ပိုင်းဒေသတွေမှာ ဖြစ်လေ့ဖြစ်ထရှိတဲ့ အံ့ဖွယ်သဘာဝဖြစ်စဉ်တစ်ခု ဖြစ်ပါတယ်။ ဒါပေမဲ့ ဖင်လန်နိုင်ငံရဲ့ ထူးခြားချက်ကတော့ အာတိတ်စက်ဝိုင်းရဲ့ အောက်ဘက် ပိုကျတဲ့ တောင်ဘက်ပိုင်းဒေသတွေမှာပါ ဒီလိုမျိုး ဆန်းပြားတဲ့အတွေ့အကြုံကို နီးနီးစပ်စပ် ကြုံတွေ့ရတတ်တာပဲ ဖြစ်ပါတယ်။
ဥပမာပြောရရင် လက်ပ်လန်အနောက်တောင်ပိုင်းက Kemi မြို့ကနေ မြောက်အရှေ့ပိုင်းက Kuusamo မြို့အထိ (အာတိတ်စက်ဝိုင်းရဲ့ အောက်ဘက် ကီလိုမီတာ ၁၀၀ ဝန်းကျင်အကွာ) ရှိတဲ့ ဒေသတွေမှာလည်း ညဘက်မှာ မှောင်မသွားဘဲ လင်းမြဲလင်းနေတဲ့ ညမရှိတဲ့ညတွေကို မြင်တွေ့နိုင်ပါတယ်။ ဒါပေမဲ့ မြောက်ဖျားပိုင်းဒေသတွေလောက်တော့ ရက်အပိုင်းအခြား ကြာမြင့်မှာမဟုတ်ဘဲ ရက်သတ္တပတ် အနည်းငယ်မျှသာ ကြာမြင့်မှာ ဖြစ်ပါတယ်။
တစ်နိုင်ငံလုံးအတိုင်းအတာနဲ့ ခံစားရမယ့် နွေရာသီအလှ
ဒီဖြစ်စဉ်ဟာ မြောက်ပိုင်းဒေသတွေတင်မကဘဲ ဖင်လန်နိုင်ငံရဲ့ တောင်ဘက်ပိုင်းအစွန်အဖျားအထိပါ သက်ရောက်မှုရှိပါတယ်။ တစ်နွေရာသီလုံး နေ့ခင်းဘက်အချိန်တွေက သိသိသာသာ ပိုမိုရှည်ကြာသွားမှာဖြစ်လို့ ဖင်လန်ပြည်သူတွေရော၊ ကမ္ဘာလှည့်ခရီးသွားတွေပါ နွေရာသီရဲ့ သာယာလှပတဲ့ နေ့ရက်တွေကို အိပ်ရေးပျက်ခံပြီးတော့ကို အချိန်ယူ အပြည့်အဝ ခံစားနိုင်ကြမှာပဲ ဖြစ်ပါတယ်။
ညသန်းခေါင်ယံမှာ နေရောင်ခြည်နွေးနွေးအောက် လမ်းလျှောက်ရတဲ့အရသာ၊ ရေကူးရတဲ့အရသာနဲ့ သဘာဝတရားကြီးကို ငေးမောရတဲ့ ခံစားချက်တွေဟာ ဖင်လန်နိုင်ငံရဲ့ ‘Nightless Nights’ ရာသီမှာတင် ရှာဖွေတွေ့ရှိနိုင်မယ့် အဖိုးတန်အမှတ်တရတွေပဲ ဖြစ်ပါတော့တယ်။
No comments
Post a Comment