ဖင်လန်နိုင်ငံမှာ အလွန်အမင်း အေးခဲတဲ့ ရာသီဥတု (Frost) ဒဏ်ကို ခံစားနေရတဲ့သူတွေအတွက် မိမိကိုယ်ကို ဘယ်လိုကာကွယ်ရမလဲဆိုတဲ့ ကျန်းမာရေးလမ်းညွှန်ချက်ကို ပြန်လည်မျှဝေပေးလိုက်ပါတယ်။ အထူးသဖြင့် နာတာရှည်ရောဂါရှိသူတွေနဲ့ ကလေးသူငယ်တွေအတွက် အောက်ပါအချက်တွေကို ဂရုစိုက်ဖို့ လိုအပ်ပါတယ်။
🧥 အလွှာလိုက် ဝတ်ဆင်ခြင်းဖြင့် အအေးဒဏ်ကို ကာကွယ်ပါ
အအေးဒဏ်ကြောင့် အသားအရေ ပျက်စီးခြင်း (Frostbite) ကို ကာကွယ်ဖို့ အဝတ်အစား ဝတ်ဆင်ပုံက အလွန်အရေးကြီးပါတယ်။
ဦးခေါင်းနှင့် လည်ပင်း: ခန္ဓာကိုယ်ရဲ့ အပူချိန်အများစုဟာ ဦးခေါင်းကနေ ထွက်သွားတတ်လို့ နား၊ နဖူးနဲ့ ပါးပြင်တွေကို လုံအောင်ဖုံးနိုင်တဲ့ ဦးထုပ် ဆောင်းပါ။ လည်ပင်းကိုလည်း ပဝါနဲ့ သေချာပတ်ပါ။
လက်အိတ်: လက်ချောင်းလေးတွေ ပါတဲ့ လက်အိတ် (Gloves) ထက် လက်မတစ်ခုတည်း သီးသန့်ပါတဲ့ လက်အိတ် (Mittens) က အပူချိန်ကို ပိုထိန်းပေးနိုင်ပါတယ်။
အလွှာလိုက်ဝတ်ပါ:
အတွင်းဆုံးအလွှာ: ချွေးစုပ်ပြီး လေဝင်လေထွက်ကောင်းတဲ့ သိုးမွေး (Wool) ထည်မျိုး ဝတ်ပါ။
အလယ်အလွှာ: အပူကို ထိန်းပေးနိုင်တဲ့ အနွေးထည်မျိုး ဝတ်ပါ။
အပြင်အလွှာ: လေကာအင်္ကျီမျိုး ဝတ်ဆင်ပါ။
🧴 မျက်နှာလိမ်းခရင်မ် သုံးစွဲရာတွင် သတိပြုရန်
အအေးဒဏ်ကာကွယ်ဖို့ မျက်နှာမှာ ဆီဓာတ်များတဲ့ အဆီခဲတွေ လိမ်းတာဟာ ပိုပြီး အန္တရာယ်ရှိနိုင်ပါတယ်။
အဆီနဲ့ အရေပြားကြားမှာ ချွေးတွေအောင်းပြီး အေးခဲသွားတဲ့အခါ အသားအရေကို ပိုပျက်စီးစေပါတယ်။
မျက်နှာလိမ်းခရင်မ်ကို အပြင်မထွက်ခင် အနည်းဆုံး ၁ နာရီ ကြိုလိမ်းထားပါ။
အသားအရေကို ကာကွယ်ဖို့ အကောင်းဆုံးနည်းလမ်းကတော့ မျက်နှာဖုံးစွပ် (Balaclava) သို့မဟုတ် ပဝါနဲ့ စနစ်တကျ ဖုံးအုပ်ထားခြင်းပဲ ဖြစ်ပါတယ်။
👶 ကလေးငယ်များအတွက် အထူးဂရုစိုက်ရန်
ကလေးကို နွေးနွေးထွေးထွေး ဝတ်ပေးရုံတင်မကဘဲ ချွေးထွက်ခြင်း ရှိ၊ မရှိ စစ်ဆေးပါ။ (ချွေးထွက်ပြီး အေးသွားပါက ပိုအန္တရာယ်ရှိနိုင်လို့ပါ)
မျက်နှာနဲ့ အသက်ရှူလမ်းကြောင်းကို အအေးဒဏ် တိုက်ရိုက်မထိအောင် ဖုံးအုပ်ပေးပါ။
🏃 အေးခဲတဲ့ ရာသီဥတုမှာ ကိုယ်လက်လှုပ်ရှားမှု လုပ်ခြင်း
အလွန်အေးတဲ့နေ့တွေမှာ ပြင်းထန်တဲ့ လေ့ကျင့်ခန်းလုပ်တာကို ရှောင်ပါ။
လေ့ကျင့်ခန်းမလုပ်ခင် ခန္ဓာကိုယ်ကို အရင်နွေးအောင် (Warm up) အချိန်ပေးပြီး လုပ်ပါ။
အသက်ရှူလမ်းကြောင်းရောဂါရှိသူများ: အေးတဲ့လေက ရောဂါလက္ခဏာကို ပိုဆိုးစေနိုင်လို့ လေ့ကျင့်ခန်း ပြင်းထန်မှုကို တစ်ဝက်လျှော့ချပါ။ အပြင်ထွက်တဲ့ အချိန်ကိုလည်း ခဏချင်းစီသာ ထွက်ပါ။
No comments
Post a Comment