**၁၆.၀၉.၂၀၂၅ ** ဖင်လန်သတင်းစာများ၏ ခေါင်းစီးသတင်းများ

ဒီအပတ်အင်္ဂါနေ့ထုတ် သတင်းစာများထဲမှ အဓိကအကြောင်းအရာတွေကို အကျဉ်းချုပ်တင်ပြပေးလိုက်ပါတယ်။

• အလုပ်နှစ်ခု တွဲလုပ်သူများ၊ 
• အိမ်မှာတစ်ယောက်တည်း ကျန်ခဲ့တဲ့ကလေးများနဲ့ 
• ပစ္စည်းသိုလှောင်သူများ

အလုပ်နှစ်ခု တွဲလုပ်သူများ၊

ဖင်လန်နိုင်ငံမှာ အလုပ်နှစ်ခုကို တွဲလုပ်သူတွေ ပိုများလာတယ်လို့ Helsingin Sanomat သတင်းစာက ဖော်ပြပါတယ်။ ၂၀၁၄ ခုနှစ်မှာ အလုပ်အပိုလုပ်သူ ၉၀,၀၀၀ ခန့်ရှိရာကနေ ၂၀၂၄ ခုနှစ်မှာ ၁၃၈,၀၀၀ အထိ သိသိသာသာ မြင့်တက်လာခဲ့ပါတယ်။ အပိုဝင်ငွေရရှိဖို့၊ ဘဝကို ပိုအဆင်ပြေစေဖို့နဲ့ ဝါသနာပါရာအလုပ်တွေကို လုပ်ကိုင်ဖို့အတွက် အများစုက အလုပ်အပိုလုပ်ကြတာဖြစ်ပါတယ်။

ဥပမာအားဖြင့် Leena Väkiparta ဆိုတဲ့ အသက် ၃၇ နှစ်အရွယ် သားဖွားဆရာမတစ်ဦးဟာ အချိန်ပြည့်အလုပ်အပြင် ညနေပိုင်းနဲ့ စနေ၊ တနင်္ဂနွေနေ့တွေမှာ အလှအပဆိုင်ရာ ကိုယ်ပိုင်စီးပွားရေးလုပ်ငန်းတစ်ခုကို လုပ်ကိုင်ပါတယ်။ ဒီကနေ တစ်လကို ယူရို ၅၀၀ ခန့် ဝင်ငွေပိုရရှိပြီး သူမရဲ့မိသားစုနဲ့ ဝါသနာအတွက် အပိုငွေကြေးအဖြစ် အသုံးပြုနိုင်တယ်လို့ ဆိုပါတယ်။

Uusi Suomi သတင်းစာရဲ့ဖော်ပြချက်အရ ကျောင်းဆင်းချိန်ပြီးနောက် အိမ်မှာ တစ်ယောက်တည်း ကျန်ခဲ့ရတဲ့ မူလတန်းကျောင်းသားလေးတွေအတွက် နေ့လယ်ခင်းတွေဟာ အထီးကျန်ဆန်ပြီး ပင်ပန်းတဲ့ဝန်ထုပ်ဝန်ပိုးတစ်ခုလို ဖြစ်နေတယ်လို့ သိရပါတယ်။ Mannerheim League for Child Welfare (MLL) ရဲ့ အကူအညီပေးရေး ဖုန်းလိုင်းဆီကို ဝင်ရောက်လာတဲ့ ဖုန်းခေါ်ဆိုမှုတွေနဲ့ မက်ဆေ့ချ်တွေကနေ ဒီအချက်ကို သိရှိခဲ့ရတာဖြစ်ပါတယ်။ MLL ရဲ့ ပံ့ပိုးရေးဌာန အကြီးအကဲ Tatjana Pajamäki က အသက် ၉ နှစ်ကနေ ၁၁ နှစ်ကြား ကလေးငယ်တွေဟာ ဒီပြဿနာကို ပိုပြီးရင်ဆိုင်ရတယ်လို့ ထောက်ပြခဲ့ပါတယ်။ သူတို့တွေဟာ အများအားဖြင့် မိဘတွေမရှိချိန် အိမ်သော့ပျောက်တာ၊ အသံဆိုးတွေကြားရတာ ဒါမှမဟုတ် ဖျားနာလို့ စိတ်အဖော်လိုချင်တာမျိုးတွေအတွက် အကူအညီတောင်းခံတတ်ကြပါတယ်။ ဒီလိုအခြေအနေမျိုးဟာ မိဘတွေရဲ့ အလုပ်ချိန်နဲ့ ဖင်လန်နိုင်ငံရဲ့ ကျောင်းချိန် တိုတောင်းတာတို့နဲ့ ဆက်စပ်နေတယ်လို့လည်း သူက ပြောပါတယ်။

လူမှုဖူလုံရေး အကူအညီခံစားခွင့်များပြားလာ။

Ilta-Sanomat သတင်းစာက Kela လူမှုဖူလုံရေးအကူအညီ ခံစားခွင့်ရှိသူတွေနဲ့ ပတ်သက်ပြီး လေ့လာမှုတစ်ခုကို ဖော်ပြခဲ့ပါတယ်။ စာရင်းဇယားတွေအရ အာရဗီစကားပြောသူ၊ ဆိုမာလီစကားပြောသူနဲ့ ယူကရိန်းစကားပြောသူတွေဟာ ဖင်လန်စကားနဲ့ ဆွီဒင်စကားပြောသူတွေထက် လူမှုအကူအညီရရှိသူ ရာခိုင်နှုန်း သိသိသာသာ ပိုများနေပါတယ်။ ဒါပေမဲ့ Kela ကတော့ အကူအညီရရှိသူစာရင်းမှာ အသက်မပြည့်သေးတဲ့ကလေးတွေလည်း ပါဝင်နေတာကြောင့် အာရဗီနဲ့ ဆိုမာလီစကားပြော လူဦးရေမှာ ကလေးများတာနဲ့အမျှ စာရင်းဇယားတွေမှာ အဆမတန် များနေတာဖြစ်တယ်လို့ ရှင်းပြခဲ့ပါတယ်။

အထက်တန်းစာမေးပွဲပြဿနာများဖြစ်

ဖင်လန်နိုင်ငံရဲ့ အထက်တန်းစာမေးပွဲဖြစ်တဲ့ Matriculation Exam မှာ နည်းပညာပိုင်းဆိုင်ရာ ချို့ယွင်းမှုတွေကြောင့် ပြဿနာအချို့ ကြုံတွေ့ခဲ့ရပါတယ်။ တနင်္လာနေ့က မူရင်းဘာသာစကားစာမေးပွဲမှာ နည်းပညာချို့ယွင်းချက်ကြောင့် ကျောင်းအတော်များများမှာ စာမေးပွဲကို ရပ်နားခဲ့ရပါတယ်။ စာမေးပွဲ ရပ်နားချိန်အတွင်းမှာ ကျောင်းအချင်းချင်း လုပ်ဆောင်ပုံခြင်း မတူညီခဲ့ကြပါဘူး။ တချို့ကျောင်းတွေမှာ ကျောင်းသားတွေ မှတ်စုယူခွင့်ရခဲ့ပေမဲ့ တချို့ကျောင်းတွေမှာတော့ မှတ်စုတွေ ပြန်သိမ်းခိုင်းခဲ့ပြီး အစကနေ ပြန်စခိုင်းတာမျိုးတွေ ရှိခဲ့ပါတယ်။ ဒီလိုကွဲပြားတဲ့ လုပ်ဆောင်မှုတွေကြောင့် ကျောင်းသားတွေရဲ့ အခြေအနေ မတူညီတော့တာကို Finnish Matriculation Examination Board (YTL) က မျှတအောင် ဆောင်ရွက်ပေးလိမ့်မယ်လို့ သတင်းတွေက ဖော်ပြပါတယ်။